原來二零零八年以來都未"舖"過文! 

今日出旺角買左隻又平又靚既2G手指,紅當當咁好有過年氣份,都只係一舊水,最可惜既係,呢支野都係要"牙"兩個drive,一個係for個乜鬼data traveler password protect,好鬼老土!可唔可以唔好迫人用多個drive呀?  

跟住同屋企人去左花墟球場個"本地漁農美食迎春嘉年華",類似小型工展會咁,勝在免費入場。好多有機檔,不過當中有幾"有機"就唔知,因我阿爸成日都堅稱自己種果d野係有機,哈哈。不過其中一檔d蘋果乾真係好鬼好味,廿蚊包係貴左少少,但買包黎食下都幾好。

夜晚去左分別有兩位同事推介過既"泰屋"食晚飯。去到都未到七點,未係好多人,個環境都唔錯,氣氛都幾柔和。

先黎一個冬蔭公海鮮湯,叫左個大既,但份量唔係好多,六個人飲其中有兩碗得半碗。好大隻蝦,味道ok啦,我覺得唔夠"冬蔭",如果d味再濃d就更好。


第二味上檯既係金柚沙律,個柚幾香甜,調味又唔會太酸,幾適中,好味。


跟住就係青咖喱雞,好少辣,都算香,雞肉幾滑添。不過未naan同葱油餅都未上,得個望字先。


望既途中,就到傳聞中必食之一既豬頸肉出場。個汁既酸辣度恰到好處,d肉就好似有少少食jucie豬肉乾咁。


葱油餅終於送上,夠軟身,又煙刃。


然後就係泰式椰菜仔時菇(大約咁上下名),我覺得略為濕左d,如果少d上湯我覺得會更好味。


第二樣必食既野,就係naan啦,真係幾好味,脆得黎唔會太乾,又唔會一陣麵粉味咁,加埋d青咖喱就真係好正。


又叫左一碟兩面黃,睇個款好似中式干燒伊麵。講真,我本人對干燒伊麵就麻麻,因為覺得硬掘掘唔好食。但呢碟麵就好好味,脆得黎又唔會話中間食到d麵粉味同埋唔會中間好梗,係一種十八歲卜卜脆既感覺,哈。而個獻汁亦都做得幾好。


最後上既係南瓜海鮮炒飯,又係一大隻蝦!我阿媽連d南瓜肉都有刮出黎食,阿妹話加咖喱汁都唔錯。


大致上服務亦都唔錯,有斟水,有換碟。另外叫左兩個椰青埋單都係七百蚊,幾抵食。
(丫... 好似好耐冇寫過食評...)

食完飯既餘慶就係去左做腳底按摩,另加半part肩背按摩。真係第一次響香港做腳底按摩,哈。今早小腿抽筋痛醒左,去做按摩就最o岩,加上呢期肩背肌肉好緊,想去按好耐咖啦,不過你叫我專登上大陸按我又唔會。阿師傅手勢都唔錯,按完回家途中搭車仲覺得兩肩係暖咖。真係鬆左好多。

好,一次過打左好多字,yes!
創作者介紹
創作者 aaweb 的頭像
aaweb

AA廢苦之言

aaweb 發表在 痞客邦 留言(4) 人氣()