第二日join左個package附送既巿內一日遊。去左野柳同九份,都係每人收五十蚊港幣既小費咋,好抵!本來下午係會去浸溫泉同夜晚會去士林夜巿添咖,不過因為大部份人都冇咩興趣去浸溫泉,所以就送番大家去酒店。

之前咁多次去台北都未去過野柳,因為交通唔多方便,今次總算去到。果度d石頭又的確幾特別,走果時有d特產紫菜,好平下,五十蚊台幣一大包。d檔仲會煲定d紫菜湯俾大家試味,試o岩先買,幾好。

九份就差不多每次去台北都會去咁濟,所以都冇咩特別。我阿爸話要去飲茶,就入左一間唔記得叫咩名既茶館,幾鬼靚咖,可惜d靚位俾人坐哂。結果我地坐左出露天既地方,好鬼曬呀!而且我地又冇乜時間,飲左半個鐘就要走啦,d茶葉仲剩番好多,我地唯有拎走d未用既茶葉啦。順帶一提,佢d巴樂乾幾好味。

返到酒店安頓好兩老,我同阿妹就去左新光三越果頭行街,夜晚再同個親戚去左明x百貨上面既餐廳食自助餐。間野都幾大,除左自己去夾野食之外,仲可以叫佢炒野同埋有火鍋仔添。不過咁o岩坐側邊係班學生搞謝師宴之類,好鬼死嘈。

arrow
arrow
    全站熱搜

    aaweb 發表在 痞客邦 留言(0) 人氣()