ＡＡ廢苦之言

日期: 2010-01-02
地點: 大埔新娘潭

表面上，呢個係一個歌迷會既聚會，實際上，係一個攝影活動。

原本只係得幾丁人既攝影活動，攪攪下變左十幾人，都幾開心。本來去新娘潭主要係影瀑布，不過呢期個瀑布好似交完稅個saving account咁，冇咩水，所以都冇咩氣勢。幸好團中有上鏡女model率先擺好pose俾大家影，影影下仲要出陽光，好鬼正。

然後就到影水花，2號女模(唔係女巫)好明顯係冇受過「豬業訓練」，d表情唔係咁配合到d 水花(俗稱交唔到戲)，不過幸好其天生麗質，嬌嫩肌膚好似搽左高清粉咁，以補不足。

拍完單人照就到拍合照既環節，好明顯兩對夫妻都搵番n年前拍婚紗照既感覺，不過我覺得呢一輯相之中既笑容就比婚紗照更自然啦！

最後係重頭戲，就係主角大明星拍照時間。一出場，立即幾十支鏡對住佢係咁影，真係好有明星既風範，哈哈。

講完個活動，都係要做番個攝影總結。
首先想講下個地點，都唔錯，唔駛行好遠就去到d景點，只係有d位俾較「跣」同有少少難行，例如跳上個大石上面就要有d身手敏捷既人士幫手先至上到，個位真係靚好多咖！可惜既係水唔夠，不過都照影啦。

個天位好爆，所以又係出動我的最愛漸變灰既時候；當然，又順便荼毒一下身邊既拍友啦。

本來想學阿sir影調色碟，不過d 光唔係咁得，冇試到。

結果係反而變左主力影人像，當然係用支50mm/1.8影啦，開初幾張既曝光都under左，後來轉左角度再改變快門速度就好d。不過原來影人像要靚都真係要用反光板好d，因為有d垂頭照塊面就唔夠光。

人像照因肖像權問題不便公開，風景照就post左去picasa。