ＡＡ廢苦之言

日期: 2009-01-03
地點: 中環、上環

星期六影左成日相其實都好攰下，夜晚又約左舊同事打邊爐，打完番到屋企都成十一點幾，攪呢攪路，成兩點幾至訓，所以真係有d想縮沙唔去呢個外影實習。不過鬧鐘照較啦，加上大明星叮囑左我照顧佢朋友，七點半個鬧響我就彈起身昅下出面咩環境，咦，有陽光喎，即刻起身梳洗兼收拾行裝，八點四出門口，準時九點到達集合地。

因為雙肩實在太痛，所以只係帶左支50/1.8 同支天涯，連cpl都冇帶，一個字：頹。不過支50/1.8又真係幾好影全日都差唔多係用哂佢。出門途中見個天好藍，陽光又靚，趕時間都忍唔住手影左幾張，不過原來我塊filter上面好dirty下。呢個故事教訓我唔好朝早至執鏡，應該早一晚執兼檢查下有冇需要清潔一下。

九點去到其實都預左唔會準時開波，不過我就儘量唔做遲到果個咁啦，見有時候立即飛奔落去地鐵站買早餐食，肚餓冇力影相！美心d三文治真係唔得，早知去七仔買算。食完早餐同d同學吹下水，終於都出發。我地組基本上全部人都係本身識既，第一個拍攝點係置地廣場。果真係富貴，d decoration靚到dump一聲，尤其係d水晶，鬼死咁大粒，又多。一開始跟大隊上左二樓，但係發覺得支50mm係唔適宜響二樓影，所以都係落番去，希望搵到d靚既構圖。睇黎睇去最靚係d 水晶吊飾個弧，加上記得阿sir 果d玩「焦外成像」既聖誕燈飾相，所以就用呢兩個Points黎影。然後又發現個水池個邊又幾靚，於是又影一餐，最可惜係佢用野圍住，好多時佢d柱就入哂鏡，好難就。不過就真係幾鍾意d水既反光，個質感好幼滑。

第二站係IFC附近果個朱銘雕塑。一向對朱銘雕塑情有獨鍾，不過確實好難拍。好大班人聚集左響度，包括阿SIR。見冇咩好影，跟同學玩下擰鏡同拉爆，我用到1/10秒快門都係擰唔到咩出樣，同學用1/13都擰得好靚！下次有機會再擰過！跟住有人洒水洗水牛雕塑，嘩，成班人係咁按快門，好似打雀咁有機關槍聲，好誇！我就咩都影唔到。

第三站係西環電車總站。個電車軌彎幾靚，他日有魚眼鏡要再去影下。然後又跟阿SIR繼續向海味街進發。無端端，阿SIR又發現街上面有條鎖鍊個反光好靚，好多同學就湧埋去影，我就唔同佢地迫啦，企響度睇佢地點影同埋聽下阿SIR既COMMENT。然後又繼續行，行行下，阿SIR又SPOT到有個招牌閃閃生光，攝影眼即係攝影眼！果D金光，真係企高一級就已經睇唔到！阿SIR教路要曝光準確先至可以影到個質感出黎，最好有支長鏡影過去，不過我冇丫，唯有CROP相，一樣OK，不過好似唔夠SHARP。真係影開有癮，之後就不斷咁搵D靚招牌黎影，又影下舖入面既瓶咁。海味檔D阿姐都好搞笑，佢地話：影貨好啦，唔好影人。

最後食完飯再番去條鎖鍊位影，唔駛同人迫，任影，真好。原來個反光位係好易爆，而且構圖亦都唔易。是日外影實習亦告結束，獲益不少。