日期:2010-01-09 至 2010-1-10
地點:從化、石門

拖左幾日終於有時間寫。好開心第一次跟海鷗會去攝影團,有大量勁人可以抄下功課,就算抄唔到,睇下人地d作品都係好。

第一站係影梅花。從化既梅花樹同惠東既都幾唔同,好似冇咩蒼勁既樹枝,所以主力係影d花既特寫。今次不辭勞苦咁「咩」左支騰龍500波波鏡去,果然係冇白費,好鬼sharp,sharp到同行人事都即係買番支,好毒,哈哈。是日既天氣唔係太隱定,時有陽光時暗,要趁有陽光就影d花透光。構圖方面仍然係有「無從入手」既感覺,同志仍須繼續努力。

(其實真正既第一站係食完飯阿sir叫個model出黎俾我地影,奈何我地部機響車上加上唔識影人像又冇適合既鏡,所以結果都係齋睇)

第二站係油菜花。係第一次影,我地冇跟大隊留響個景點,反而走左去一邊比較人少既地方,繼續主力用支波波鏡,嘩,好開心,d散景有油畫feel呢!忍唔住同d團友玩埋自拍,哈。另外見帶左支384黎又未用過,都影左幾多,d色真係出得幾靚。下次希望有機會影下一大片油菜花田既風光。

第三站係影紅葉。阿sir真係勁,搵到靚位俾我地一大班人影。霧中既紅葉另添左幾個層次,不過要掌握霧聚霧散不同曝光顯得有d雞手鴨腳。另外阿sir又教路影霧中戀人(有人影婚紗相),真係唔夠眼名手快,我企個位明明算係幾好,但係zoom得太近,出唔到d氣氛與層次。

嗯... 下次唔可以隔咁耐至寫總結,好多野都忘記左添...





創作者介紹
創作者 aaweb 的頭像
aaweb

AA廢苦之言

aaweb 發表在 痞客邦 留言(0) 人氣()