ＡＡ廢苦之言

今晚去左重慶食咖喱。大廈門口既「宣傳人士」依然係咁熱列，未入到去就一窩蜂咁湧埋黎。一輪披荊斬棘之後，終於安全抵達E座lift口，響一個滿面胡鬚既巴藉宣傳人士陪同下搭lift 上去。為左貪快，搭左部雙數lift上八樓行番落一層，見到門口寫住「member only」。雖然只係七點鬆d，入面都已經坐左好多圍。
我地被安排坐左響間獨立房，所以唔嘈，不過間房都幾細，我地估計一張雙人床都未必放得落。

坐低一陣都唔係太有咩特別既idea食乜，本來都係打算係咁揀D黎試下，不過好在叫著老板JOHNNY黎落ORDER，咁我地就俾佢發板，佢幫我地叫左三款NAAN(芝士、蒜蓉、薯仔)、鐵板雞、三款咖喱(羊、牛、雞)、一碟蔬菜同埋DRINK。味道都幾好，而我地選左小辣，所以D咖喱都唔辣，好易入口。唔知係咪因為以前都食過，冇咩特別驚喜，但係以每人八十蚊既價錢，我覺得都幾好味，都可以間唔中去下。不過係樓下D宣傳人士比較「嚇氣」，下次都係走小路，唔由正門入先得。