ＡＡ廢苦之言

呢幾日一直係咁落雨，返工放工都好唔方便。如果黑雨咪好囉，唔駛返工。返到黎又冇野做，老細都知我冇野做，佢俾我既野我又做哂，新工作佢又未confirm d requirement, 俾唔到俾我做，成日響樹大無聊。上網又冇以前咁方便，唯有轉行睇書。不過睇書都幾眼訓，尤其睇到d source code，所以睇得好慢下。成日都想著手做返學果份project，但係學高根話齋，由零開始係成個project最難之處，d program都唔知應該由邊度寫起好，哈哈！

講開返學，自從返左學之後，少左好多去做運動既時間，冇以前咁好可以一星期做兩、三日gym。游水雖然搵到好地方，但係天氣唔好一樣係冇得游。阿妹好似有打算朝頭早去做一個鐘頭gym先返工，我諗諗下都想跟埋去，因為覺呢排少做左運動之後好似唔多健康咁，雖然冇咩大病，但係覺得成日有小毛病咁。

今日終於可以唔駛再用九倉條電話線啦，因為早兩日電盈打電話黎，話九倉話我欠佢錢，唔俾轉。佢一日唔搞清楚條數，我一日都唔會再俾錢。但係我真係好唔想再用九倉，問個女仔有咩計，電盈既員工真係醒好多，當我話比佢知條電話線其實係用黎傳真、上網之用，佢就問我其實需唔需要保留番個電話號碼，如果唔需要，就即刻可以申請一個新既，兩三日就可以安排安裝。咁我即刻接納佢個提議啦，佢仲俾左幾個靚number我揀添呀，幾鬼易記。今日電盈黎左裝線啦，我以後唔駛再受九倉d不知所謂既service既氣，俾錢仲要勞氣，真係唔抵！個女仔仲八俾我知，原來九倉既客顧服務熱線係廣州做咖，唔怪得咁差啦。我唔係歧視大陸人，而係佢地既水準真係未到水平，所以香港人人工貴係有理由咖，一分錢一分貨。