ＡＡ廢苦之言

日期: 2009-12-25
地點: 西貢獅子會

阿sir話，最好每次去影相之後都做個總結。等我都試下聽阿sir講，做個總結。

朝早起身見有陽光，立即出發，打算去拍殘荷；奈何到步後發覺荷花池既光線唔係太靚，眼尾見到荷花池附近個兒童遊樂場有一棵楓葉，葉都轉黃左，陽光剛好響樹頂，於是轉投紅葉懷抱。楓樹附近都係其他綠葉樹，而且樹身比較高，所以我覺得比較適合拍close up。不過要搵靚葉一d都唔易。標本林果邊仲有幾棵楓樹，不過生得太高，d葉又密，唔識影，所以冇影到。

拍完紅葉走左去小池，好多花，光線又唔錯，所以拍左好多睡蓮。d 葉既反光都幾勁，可惜又冇帶我既至愛漸變灰，唯有都照影。幾鍾意水中花既倒影，可惜如果要影到個倒影好清楚，真花身就會勁爆，所以最後決定只係影個水中花啦。

兜完一大個圈，再番轉頭去荷花池睇睇，太陽位置高左，所以已經穿過樹頂，令到池邊某d地方泛著金光，於是決定試下捕捉d咁靚既光。又係唔易，高光位好影爆，想要個太陽光又係會爆。最後用nikon獨有重曝功能影左幾張有d朦朧+金光閃閃feel既相，都幾鍾意。另外亦都好鍾意水中蓮蓬與水交接果條反光膠水邊，好鬼靚。

今次雖然帶左三支鏡去，結果只係用左支300mm波波鏡，可能係我中波波毒太深，唔忍心換鏡(定係因為懶?)。總結黎講，因為聽左阿sir上堂講既野，今次會比較注意d光線同埋光位，曝光仍然係有待改善(波波鏡即係又係人肉測光)。另外對焦亦都加倍小心左，因為係手動對焦，好多時番到去先發現唔夠sharp，就咁又冇左張相。留心左之後真係好左好多，我諗我之前太頹同太大意，真係要好好改過至得。