ＡＡ廢苦之言

問過導遊話ｄ熊貓係上午活躍ｄ，所以我地就揀左上午去熊貓基地。
園裡除左有大熊貓之外，仲有一種叫小熊貓（red panda）既野
，貌似卡通片入面既腕熊，都幾得意。但係總不及熊貓本身咁得意。在「熊貓幼兒園」內，有一隻熊貓媽媽懷中抱住熊貓BB響個密室裡面，因為佢背向左個窗，所以只可以從電視中見到得正面。幼兒園外露天既地方分別有幾隻幼年熊貓，佢地一隻就掛住食野，後來仲有遊人付出高昂價錢（好似係四百個大洋）黎同熊貓近距離接觸影相，仲著哂鞋套手套咁添。另外有幾隻就響樹玩，好搞笑，碌黎碌去，又打下交，咬下耳仔咁，睇左好耐大家都唔捨得走，仲錄左好多短片呢！而成年熊貓就超級懶，淨係掛住訓，個工作人員叫佢起身食野佢都唔醒呀！哈哈！


下午去左三星堆遺址古蹟參觀。身為一個理科生，中國歷史只有中三程度（仲要係僅僅合格果隻），一早就預左係悶戲一場，但係估唔到又一ｄ都唔悶喎，可能係因為個講解員講得好啦，同埋ｄ文物真係好勁，可以睇到幾千年前ｄ人都咁有智慧，同埋響冇咩工具既情況之下都做到咁多野，利害！

晚飯我地去左琴臺路一家食箘類火窩店，叫「武陵火窩」，一人一窩咁都幾企理，ｄ湯幾好飲，清清淡淡咁，幾好。食完飯就去左文化公園行左一陣，等夠鐘睇「蜀風雅韻」。呢個表演真係幾精采，有奏樂（笛、二胡、高胡），戲曲，變臉，木偶劇，手影戲等等，其中個變臉勁到可以由冇變番有（即係本來已經係用真面目示人，但係佢竟然可以變番一張花臉上去，勁！），真係拍爛手掌。個木偶戲又係好得意，ｄ動作好真，好似一個ｍｉｎｉ　ｓｉｚｅ既人響樹做大戲咁。至於個手影都唔弱，表演果個人ｄ手指關節好靈活，對手又軟，整左好多好似既動物影子出黎，諗番起以前細個屋企停電時玩果ｄ就真係差天共地咯，哈哈！ 睇完表演，導遊問我地仲想唔想去一個叫「錦里」既地方，我地見都唔算好支力，一致贊成去啦！不過去到有ｄ賣記念品同小食既地方都開始關門，但係仲有一辣酒吧就仲好熱鬧。果道都幾靚，而且夜晚黎有好多燈籠裝飾，好有氣氛。