ＡＡ廢苦之言

昨天因為電池問題而不能盡興，回來後立即再充電，今天可以用了，所以心深不憤，再怕多幾張，不過，還是拍得不太好，哈哈。

昨晚與一眾網友到尖沙咀來一個外攝聖誕燈飾活動（但看我們遇到「熄燈」多於「燈飾」，哈）。帶齊所謂全副武裝以及去敵視你做足準備的我，最後只是拍到幾張可以勉強交功課的照片，只因那兩枚我以為已充足電的電池只用了一會就Ｌｂ了，嗚～，現在還不知是那個地方出了問題，有待測試呢。

最近家中有工程進行，將部份舊電線（年紀比我還大）換新，並且房間進行大執位。昨天下班回家後便為「執位行動」揭開序幕。

畢業後差不多每年都與大學同學過除夕夜，一起倒數。今年也不例外，到了剛小登科的蘇SIR新居開派對。因為今次有小BABY首次出席除夕派對，所以將活動時間提早了，下午便開始了。有些去了打麻雀；有些則去了打網球，說什麼要重拾讀書時代的情懷。

早幾日都訓得唔係幾好，唔知係咪因為咁尋日就開始作病。拿拿臨隊左兩濟傷風冒感熱飲兼狂飲水，夜晚又park左兩粒樂信，本來打算去做尖都唔去啦，番屋企早d 訓。

頭先睇新聞話有個女童俾屋企隻洛威拿咬傷，原來佢屋企果幾隻狗都未打針咖。

今日卜星DAY BBQ大會，又係盡興而歸。野食好味，每位盛惠$78，抵！

【本報訊】本年度平安趴地終告完滿結束，是次活動除打破了以往九男女之格局外，更有多名「新血」加入。其中一名女新血不知是否鑑於對英文字母並不熟悉之故，竟誤將H和D混淆，導致「姓阻住蟹后電車男」事件發生，唯最終皆能平安到步。正當電車男前往迎接女新血之際，那邊廂就繼續那個所謂「塔羅之夜」。此處果然臥虎蔵龍，除了臨記神婆，還有一個無Ｃ，說得頭頭是道，觀眾們笑得人仰馬翻，期間更有人「欲豎姆指」，不過，總結還是那句：依書直說，並無虛言，如有雷同，實屬不幸。做多Ｄ善事，俾心機讀書啦，無事咖！

今日終於都搞掂埋個project。講起都有少少氣憤。

實在好氣憤，有乜理由application team要 check networking 既status？咁做乜仲要分team？

正所謂一波未平，一波又起。我另外一個project 黎緊星期二就要present，其中一個組員多日黎都失蹤，今日終於蒲頭並聲稱佢終於有時間去做啦！佢其實好熟果瓣野，之前一直要OT，連堂都上唔到，然後又出TRIP，直到今日先話得閒搞。我同另一員組就唔係好熟果瓣，苦戰左數日都總算叫交到貨啦，水準就……哈，算啦，我其實但求合格。希望呢兩日可以開始溫書啦，仲有一科23號考呀。

終於都demo埋...... 番到屋企即刻uninstall個oracle 10g XE慶祝，free番好多位出黎，正！

尋日係本學期最後一日上課日，亦係交功課既日子。講師一早講明上堂時係交功課既deadline，因為該堂會講解答案。有一個同學，操帶鄉音廣東話，佢話佢唔知要做功課，話可能因為佢冇上堂所以唔知，仲想向講師求情補交。第一，我同我個group-mate都好肯定佢之前一直有上堂，因為我認得佢d 鄉音同埋d唔多make sense既問題。第二，就算佢真係走左堂，佢自己都有責任上網睇番個webpage，講得清清楚楚幾時要交。我覺得呢條友真係唔掂，認實佢他日若不幸再窄路相逢，一定唔可以同佢一組做project，冇責任感、冇sense兼懶，死症。

今日出左機隧，照舊一直行快線，打算過左橋底先cut番左轉入漆咸道南；誰不知原來加左條白線cut唔到左，哎，好心佢加左線就早d楝個牌出黎叫人選定行車線啦，噓～搞到要兜去覺士道再兜番去尖東，老鬼土。

部dvd錄影機個預較錄影功能有問題，成日明明set左錄1個鐘，佢錄左一陣就停左，搞到冇得睇。結果尋日打去維修部問，原來好多客都有咁既問題，每當你預校weekly錄影就會「奶野」(「奶野」呢個terms係exactly維修部果個人同我講電話既用語，哈哈)。佢話應該係program bug, 暫時解決辦法係上佢地website download個firmware落黎然後upgrade部機。所以我尋晚番到屋企就要先將機內hard disk既野燒落碟先，然後再upgrade。不過好騎呢，upgrade到尾(100%)佢hang左，唔識跳番出黎，搞到我要鬆電掣再插番。好彩佢都有提醒我upgrade前先抄底 d channel既頻道，因為upgrade後會reset哂，如果用search又要search一大餐，抄底左可以人手set。希望upgrade左之後會無事啦，成日錄唔到好氣憤咖嘛。

今日又收到一個錄音廣告電話。來電顯示是私人號碼，我當時已猜到又是這種討厭的東西，反正不忙，打算聽完聲帶就接駁到該公司罵人；可恨的是，按1字也沒有接駁成功（所以聽完整段廣告也不知是那家公司）。

N年前我用果間ISP送左若干MB既WEB SPACE俾我放WEB SITE。當年仲係讀緊書，無聊之餘又好得閒，整左個網頁，其中一PART係教人講某種方言。不過後來冇再用呢間ISP，terminate service之前我又冇delete到個webpage，結果留到今時今日都仲響度。今朝早check mail，有一個人send mail 黎話教方言果一part好有趣，問我會唔會再extend，都幾surprise，估唔到個webpage咁耐都仲有人會去得到，哈哈！